Covid-19
City Express

महानायक राजेश हमालको आग्रह, दिपाश्रीलाई क्षमा गरिदिनुस्

३१ असार। केहि हप्ता देखि नायक राजेश हमालको विषयलाई लिएर सामाजिक तथा असामाजिक रुपमा हमालको पक्षमा रहेर कलाकार तथा निर्देशक दीपाश्री निरौलाप्रति अमर्यादित शब्दहरु प्रहार भईरहेका छन्।सम्बन्धित विषयमा विभिन्न कलाकार एवं विश्लेषकहरुले आफ्नो धारणा प्रस्तुत गर्दै स्पष्टीकरण दिने क्रम जारी नै छ। हमालको विषयमा निर्देशक तुलसी घिमिरे, शिव श्रेष्ठ, प्रकाश शायामी, राजेन्द्र खड्गी, रमेश उप्रेती, दिपकराज गिरि, जितु नेपाल जस्ता अनेकौ कलाकारहरुले विवादलाई साम्य पर्न अनेकौँ कोशिस गर्दा पनि निरौलालाई लक्षित गरेर लान्छना एवं आरोप प्रत्यारोपहरु झन् भन्दा झन बढ्दै गयो। जसको कारण निरौला डिप्रेशनमा रहेको कुरा बाहिर आईरहँदा हमाल स्वयंले एक भिडियो सार्वजनिक गर्दै दिपाश्री निरौलालाई माफि दिन सम्पूर्ण दर्शक श्रोताहरुसंग आग्रह गरेका छन्।

राती अबेर भिडियो आफ्नो फेसबुकमार्फत सार्वजनिक गर्दै हमालले भनेका छन्–‘मेरो अनुरोध छ कि, यो राष्ट्रको सिने क्षेत्रका लागि, कला क्षेत्रका लागि, मानवताका लागि अत्यन्तै सकारात्मक भएर सम्बन्धित व्यक्तिलाई माफि दिनुहोला ।’ उनले, एउटा कलाकारलाई आफ्नो क्षमता पस्किन सधै प्रेरित गर्न पनि दर्शकसँग अपिल गरेका छन् । उनकै शब्दमा ‘यहाँहरुबाट सकारात्मक प्रतिक्रियाको अपेक्षा राख्दछु । कलाकारहरुलाई अगाडि बढ्ने सहज वातावरण प्रदान गरिरहनुहुनेछ भन्ने आशा राख्दछु । हामी कलाकारहरुलाई प्रेरित गर्दै गर्नुहोला ।’

नायक हमालले आफू संलग्न भएको कला क्षेत्र विभिन्न वादविवादमा फसेको सुन्नु पर्दा आफु निकै दु:खी भएको कुरा बताएका छन्। उनले भनेका छन्–‘मलाई लक्षित गरेर कसैले आफ्नो भनाई राख्नुभयो । भनाई सुनिसकेपछि ठाडो प्रतिक्रियाहरु आएका छन् । तर, अर्को तहबाट हेर्दा, हामीले हेर्यौ भने के एउटा व्यक्तिले पेशागत हिसाबले होस् या कुनै विशेष रुचीले लक्षित भएर किन नहोस्, कुनै अभिव्यक्ति सार्वजनिक स्थलमा राख्नुहुन्छ भने एक्कासी झट्ट प्रतिक्रिया दिदा सम्बन्धित व्यक्तिको मानवतामा आँच आउने, आघात पुग्ने र चोट लाग्ने कार्य गर्नु सहि होला र ?’

हमालले व्यक्तिगत हिसाबले आफू सहिष्णुता भएको र जनताको मायाले नै आफूलाई सबै यो प्राप्त गर्न सम्भव भएको बताएका छन् । उनले भने–‘दर्शकहरुलाई म हृदयदेखि नै अनुरोध गर्न चाहन्छु, कि अली फराकिलो भएर वृहत्त चित्रलाई मनन गरेर सकारात्मक हिसाबबाट मानवताको लागि कसैको मानवताको आँच नपुग्ने गरि अभिव्यक्ति प्रकट गरौ ।’

हमालले कला क्षेत्र दर्शकको पनि भएको भन्दै आफूहरु मैदानमा उत्रिएको सुनाए । भने–‘यो कला क्षेत्र हामी केहीको मात्र होइन, दर्शकको पनि हो । मैदानमा हामी उत्रन्छौ, हामी मिहिनेत गर्छौ । तर, यसको पछाडि उर्जा दर्शकबाटै प्राप्त हुन्छ । तपाइहरुको भूमिका हाम्रो कला र सिर्जनामा अत्यन्तै ठूलो छ ।’

हाम्रो फेसबुक पेज

प्रतिक्रिया दिनुहोस्

सम्बन्धित शीर्षकहरु