२०७९ असोज ८ गत शनिवार | September 24, 2022

Bharat Poudel

गृहपृष्ठ पत्रकार महासंघ पोर्तुगलले नेपाली पत्रकारहरुका लागि अन्तर्वार्ता सम्बन्धी विशेष तालिम सम्पन्न गर्‍यो

पत्रकार महासंघ पोर्तुगलले नेपाली पत्रकारहरुका लागि अन्तर्वार्ता सम्बन्धी विशेष तालिम सम्पन्न गर्‍यो

लिस्बन । विश्वभर विभिन्न १२ देशमा रहेका ४३ पत्रकारहरुका लागि अन्तर्वार्तासम्बन्धी अत्यन्तै लाभदायक तालिम सम्पन्न सम्पन्न भएको छ । नेपाल पत्रकार महासंघ पोर्तुगल शाखाले आयोजना गरेको ‘अन्तर्वार्ताका लागि आवश्यक टिप्स’ विषयक एकदिने तालिममा सहभागी पत्रकारहरुले तालिम अत्यन्त प्रभावकारी भएको जनाएका हुन् ।

बीबीसी साझा सवालका पूर्व प्रस्तोता एवं तालिमका सहजकर्ता नारायण श्रेष्ठले पत्रकारिताको स्रोत नै अन्तर्वार्ता भएको प्रष्ट्याए । श्रेष्ठले समाजमा छलफल, कुराकानी, वार्ता वा अन्तर्कृया गरेर सत्य तथ्य र विश्वसनीय निष्कर्ष प्रस्तुत गर्नु नै पत्रकारिता भएको बताए । समाजमा प्राप्त हुने अन्तर्वार्ताबाहेककाजस्ता लाग्ने अन्य समाचारका स्रोतहरु पनि अन्तत: अन्तर्वार्ताकै उपज भएको उनको अडान थियो । भैंसी दुहेको जसरी अन्तर्वार्ता दिने मान्छेलाई फकाउदै आफूले चाहेको कुरा लिन जुक्ति लगाउनुपर्ने उपाय सुझाए ।

कान्तिपुर टेलिभिजनमा प्रसारण हुने समकोण कार्यक्रमकी प्रस्तोता एवं तालिमका अर्का सहजकर्ता निर्मला शर्माले अन्तर्वार्ता जानुअघि, अन्तर्वार्ता लिदा र सम्पादन गर्दा ध्यान दिनुपर्ने कुराबारे विस्तारमा जानकारी दिएकी थिइन् । विषयवस्तुबारे अध्ययन गर्न, उपकरणको तयारी गर्न, उद्देश्यबारे स्पष्ट हुन र सम्भावित प्रश्नको सूची तयार गर्न पनि शर्माले सुझाव दिइन् ।

एपी वन टेलिभिजनकी समाचारवाचिका, अन्तर्वार्ताकार तथा तालिमका अर्का सहजकर्ता सम थापाले नरम खालका प्रश्नबाट जटिल प्रश्न गर्दै जाने गरेको अनुभव सुनाइन् । पहिरन, बसाइँ अर्थात क्यामेराको कोण, हाउभाउ, विषयवस्तुभन्दा टाढा जान नदिने, आँखा जुधाउनेजस्ता कुराले पनि अन्तर्वार्तामा प्रभाव पार्ने उनको अनुभव रहेको छ ।

तालिमको शुरुवातमा महासंघ केन्द्रका सचिव रेमबहादुर विश्वकर्माले विदेशमा रहेर पनि नेपाली पत्रकारितालाई निरन्तरता दिने साथीहरुलाई यो तालिम उपयोगी हुने शुभेच्छा राखेका थिए । पोर्तुगल शाखाले निरन्तर यस्ता सिर्जनशील र रचनात्मक कार्यक्रमहरुको आयोजना गरिरहेको देख्दा अत्यन्तै खुशी भएको कुरा व्यक्त गर्दै विश्वकर्माले तालिम सफलताको शुभकामना दिएका थिए ।

नेपाल पत्रकार महासंघ कुबेत शाखाका अध्यक्ष हरी कृष्ण न्यौपानेले तालिमबाट धेरै कुरा सिक्ने अवसर मिलेको प्रतिकृया दिएका छन् । पोर्तुगल शाखाका सदस्य भगवान गिरीले पनि तालिम अत्यन्तै प्रभावकारी भएको बताएका छन् ।

कार्यक्रममा पोर्तुगलका १६ जना, नेपालबाट १० जना, कुबेतबाट पाँचजना, स्पेन, बेल्जियम, पोल्यान्डबाट दुई-दुईजना, नेदरल्यान्डस, साइप्रस, जर्मनी, जापान, अमेरिका, फ्रान्स र दक्षिण कोरियाबाट एक-एकजनाको सहभागिता रहेको थियो ।

तालिम जुम एप प्रयोग गरी सञ्चालन गरिएको थियो । कार्यक्रममा शुभकामना मन्तव्य राखिदिएकोमा महासंघ केन्द्रीय सचिव विश्वकर्मा, सहजीकरण गरिदिएकोमा सहजकर्तात्रय श्रेष्ठ, शर्मा र थापाप्रति आभार प्रकट गर्दै शाखाका संयोजक योगेन्द्रमिलन छन्त्यालले सहभागी सबैलाई धन्यवाद ज्ञापन गरेका थिए । तालिमको औपचारिक कार्यक्रमको सञ्चालन शाखाका प्रवक्ता पेम्बागेलु शेर्पाले गरेका थिए ।

प्रतिक्रिया दिनुहोस्

सम्बन्धित शीर्षकहरु