नेपाली महिला समाज पोर्चुगलले आफ्नो प्रथम बार्षिक साधारण सभा हिजो मे २४ तारिख आइतबार लिस्बनमा सम्पन्न गरेको छ । गत मार्च ८ तारिख अन्तर्राष्ट्रिय श्रमिक महिला दिवसको अवसरमा साधारण सभा मनाउन भब्य तयारी गरिरहेको संस्थाले कोरोना महामारीका कारण कार्यक्रम स्थगित गरेको थियो । कोरोनाको कहर र सरकारले जारी गरेको नियमलाई मध्यनजर गर्दै सामाजिक तथा व्यक्तिगत दुरी कायम गरी कार्यक्रम गरिएको हो ।

कार्यक्रममा संस्थाका अध्यक्ष निर्मला ढकालले भावि कार्य योजना सहितको प्रतिवेदन प्रस्तुत गर्नुभएको थियो ।त्यस्तै महासचिव सरिता शर्मा ले प्रगति प्रतिवेदन र कोषाध्यक्ष शुशिला थापाले आर्थिक प्रतिवेदन प्रस्तुत गर्नुभएको थियो । संस्थाले एकबर्षको अबधिमा प्यारालाइसिसको समस्यामा गुज्रिरहेकी नेपाल धादिङ निवासी एक महिलालाई उपचार खर्च स्वरुप नेपाली ५० हजार रूपैयाँ आर्थिक सहयोग गर्न सफल भएको छ । त्यस्तै पोर्चुगल मै हेल्थ डेस्क संचालन, आपसमा परिचयात्मक कार्यक्रम, नेपाली महिलाहरु बिच भेला तथा अन्तर्क्रिया, नेपाली भाषा कला र संस्कृतिको संरक्षण गर्ने उद्देश्यले तिज गीत तथा देउसी भैलो कार्यक्रम जस्ता कार्य गर्दै आएको छ भने परिस्थिति अनुसार आईपरेका समस्या हरू समाधान गर्नका निम्ति पनि सक्रिय भुमिका निर्वाह गर्दै आएको छ ।

यसैगरी विभिन्न समयमा पोर्तुगलको नेपाली समुदाय आयोजित विभिन्न कार्यक्रम र गतिविधिमा नेपाली महिला समाज पोर्चुगल सक्रिय र नेतृत्वदायी भूमिका खेल्दै आएको बारेमा प्रकाश पारिएको थियो ।

साधारण सभा कार्यक्रम महासचिव सरिता शर्माको संचालन र अध्यक्ष निर्मला ढकालको अध्यक्षतामा पोर्चुगिस भाषा कक्षाको स्कुल NIALP मार्तिमुनिजमा चलेको थियो ।