२०७७ फागुन १० गते सोमवार | February 22, 2021

Bharat Poudel
Bharat Poudel

गृहपृष्ठ स्वरोजगार बन्दै पोर्चुगलका नेपाली

स्वरोजगार बन्दै पोर्चुगलका नेपाली

पोर्चुगललाई कर्मथलो बनाउँदै आएका नेपालीले विश्वव्यापी महामारीको समय सही तवरले सदुपयोग गरेका छन्। कोरोनाको कारण उद्योग, व्यवसायको उत्पादनमा गिरावट आएपछि बेरोजगार बन्दै गएका नेपालीले घरमा बसी आम्दानी हुने बाटो खोजी गर्न थालेका छन्।

हुन पनि सन् २०२० को सुरुवातसँगै विश्व कोभिडबाट त्रसित भय। विश्वका लाखौँ नागरिक सङ्क्रमित भए। मृत्यु हुनेको संख्या बढ्दै गएकाले प्रायः सबै देशले आपत्काल घोषणा गरे। रोजगारीका लागि विश्वभर छरिएका नेपाली जस्तै यहाँका बस्दै आएका नेपाली बेरोजगार भए।

बसाइँ अनुमतिपत्र बनाउन सजिलो हुने भएकाले पछिल्लो समयमा पोर्चुगलमा आप्रवासी बढेसँगै नेपाली समुदायको पनि सङ्ख्या बढ्दै गएको छ। यसरी बेरोजगार भएका केही नेपालीले सरकारबाट पाइने सुविधा बेरोजगारी भत्ता (फुण्दो) पाएर दैनिक खर्च टारेका छन् त केही नयाँ बसाइँ अनुमतिपत्र नबनिसकेका नेपालीलाई सरकारी सुविधा, रोजगार, बेरोजगारी भत्ता नभएकाले बस्न, खान निकै समस्या छ।

सुरुवातका केही समय नेपालबाट पैसा मगाउँदै दैनिकी खर्च टार्दै गरे पनि लामो समसयसम्म कोरोनाको महामारी नरोकिएपछि थप समस्यामा परेका नेपाली युवायुवतीले घरमा बसी आम्दानी हुने बाटो खोजी गर्न थालेका छन्। समयको मागअनुसार आफ्नो सीपको सदुपयोग गर्दै आम्दानीको स्रोत खोज्नतिर नेपाली केन्द्रित भएका छन्। बाक्लो संख्या रहेका नेपाली समुदायलाई आवश्यक पर्ने मःमः, समोसा, सेलरोटी, पनिरलगायत खाद्यान्न तयार गरी बिक्री वितरण गर्ने अभियानको सुरुवात गर्दै नेपालीले पनि मनग्य आम्दानी गर्न थालेका छन्।

पर्वत घर भइ विगत एक वर्ष पहिला पोर्चुगल आउनुभएका घनश्याम भुसाललाई तयारी मःम बनाउन भ्याइनभ्याई छ। दैनिक १०० प्लेटभन्दा बढी मःमको माग आउँछ। सुरु–सुरुमा १०-१२ प्लेट माग आउने गर्थ्याे। मःम एक्लै बनाउँदै आउनुभएको तर अहिले बजारमा माग बढी आउन थालेपछि श्रीमती र आफू मःम बनाउनै व्यस्त हुनुहुन्छ। अझ आफूले बनाएको मःम नेपालीले मात्रै नभएर विदेशीले पनि लैजाने गरेको बताउनुहुन्छ उहाँ।

उहाँ मात्रै होइन, सुनीता सापकोटा पनि सेलरोटी, समोसा बनाउन व्यस्त हुनुहुन्छ। उहाँ नेपालबाट काम गर्ने अनुमति लिएर पोल्याण्ड आउनुभयो, तर बसाइँ अनुमतिपत्र बनाउन सहज हुने हुटहुटीले पोर्चुगल आउनुभयो। उहाँ पोर्चुगल आएपछि कोरोना सुरु भयो। अनि उहाँले जानेको सीप सेलरोटी बनाउने भएकाले बजारमा सेलरोटीको माग छ कि छैन भनेर बजारको अध्ययन गर्न थाल्नुभयो। उहाँलाई हौसला प्रदान गर्दै काम गर्न अनुरोध गरेपछि अहिले बाहिर काम खोज्नुपर्ने अवस्था छैन।

बनेपाका कृष्ण तिमिल्सिना घरमा दूधबाट पनिर बनाउन निकै ब्यस्त हुनुहुन्छ। उहाँ पनि कोभिड प्रभावले घरमा पनिर तयार गर्ने अभियानमा लाग्नुभयो। दश वर्षे जनयुद्धमा होमिनुभएका तिमिल्सिना शरीरमा गोलीको छिर्का लिएर उज्ज्वल भविष्य बनाउन युरोपेली मुलुक पोर्चुगलमा हुनुहुन्छ।

रोजगारीको खोजीमा विदेशिनु भएका तिमिल्सिनालाई कोभिडले झनै समस्या थप्यो। जीविकोपार्जन गर्न कठिनाइ भएपछि अहिले उहाँले पनिर बनाउँदै आउनुभएको छ। दैनिक आठ घण्टा काम गर्दा मासिक ६६५ युरो पारिश्रमिक यहाँको सरकारले तोकेको भए पनि आँफै घरमा पनिर बनाउँदा मासिक १००० युरोसम्म कमाइ भएको छ। “मेरो दुःख देख्नेहरुले पनिर किनिदिएर सहयोग गर्नुहुन्छ। म उहाँहरुप्रति निकै आभारी छु”, उहाँले भन्नुभयो।

उहाँहरु त प्रतिनिधि पात्र मात्रै हुनुहुन्छ। उहाँहरुजस्तै विभिन्न किसिमका काम गर्दै घरमै बसीबसी आयआर्जन गर्नेहरुको संख्या बढ्दो छ। इन्टरनेटको माध्यमद्वारा बसाइँ अनुमतिपत्र बनाउन आवश्यक पर्ने कागजपत्र बनाउन वा प्रमाणीकरण गर्ने कामलाई सहजीकरण गर्दै आयआर्जन गर्नेहरुको संख्या पनि थुप्रै छ। घरघरमा पुगी सेवाग्राहीको चाहनाअनुसारको सौन्दर्य सम्बन्धित सेवा प्रदान गरिरहेका नेपाली दिदीबहिनी पनि उल्लेख मात्रामा भेटिनुहुन्छ।

कोरोना महामारीको प्रकोप अझै पनि दिनानुदिन बढिरहेकाले पोर्चुगलमा बसोवास गरिरहेका नेपालीमाझमा रोजगारीको सम्भावना खोजीमा लाग्ने नेपालीको संख्या दिनानुदिन बढिरहेको छ।

प्रतिक्रिया दिनुहोस्

सम्बन्धित शीर्षकहरु