अमेरिकाले इरानी झण्डा बोकेको एक मालवाहक जहाज नियन्त्रणमा लिएको जनाएको छ। अमेरिकी राष्ट्रपति डोनाल्ड ट्रम्पका अनुसार ‘टोस्का’ नामक उक्त जहाज होर्मुज जलडमरूमध्य पार गर्ने क्रममा रोकिएको हो।
सामाजिक सञ्जालमार्फत ट्रम्पले जहाज पूर्ण रूपमा अमेरिकी नियन्त्रणमा रहेको र त्यसमा रहेका सामग्रीबारे विस्तृत जाँच भइरहेको जानकारी दिएका छन्। उनका अनुसार उक्त जहाजले नौसैनिक नाकाबन्दी उल्लंघन गर्ने प्रयास गरेको थियो।
ट्रम्पले जहाजको आकार निकै ठूलो रहेको दाबी गर्दै करिब ९०० फिट लम्बाइको उक्त कार्गो जहाज विमानवाहक जहाजजत्तिकै भारी भएको उल्लेख गरेका छन्। चेतावनी दिए पनि जहाज नरोकेपछि अमेरिकी नौसेनाले कारबाही गर्दै नियन्त्रणमा लिएको उनको भनाइ छ।
यसैबीच अमेरिकी केन्द्रीय कमान्ड (CENTCOM) ले सार्वजनिक गरेको भिडियोमा एक नौसेना जहाजले कार्गो जहाजलाई रोकेको र गोली प्रहार गरेको दृश्य देखिएको छ।
यो घटनासँगै मध्यपूर्व क्षेत्रमा अमेरिका–इरानबीचको तनाव थप चर्किने संकेत देखिएको छ।