नेपालले एसीसी मेन्स यू–१६ इस्ट जोन कपमा नेपालले विजयी सुरुवात गरेको छ। आइतबार भएको पहिलो खेलमा ओपनर प्रसिद्ध जैसीले अर्धशतक बनाएपछि नेपालले सिंगापुरलाई ६ विकेटले हराएको हो।
सिंगापुरले दिएको १ सय ३९ रनको लक्ष्य नेपालले ३३.३ ओभरमा ४ विकेटको क्षतिमा पूरा गर्यो । प्रसिद्ध ५५ रनमा नटआउट रहे। रौनक श्रीवास्तवले ४० रन बनाए।
सिंगापुरका आकाश तेजाले ३ र युवान पाण्डेले १ विकेट लिए। त्यसअघि टस जितेर पहिले ब्याटिङ गरेको सिंगापुर ३६.१ ओभरमा सबै विकेट गुमाएर १३८ रनमा अलआउट भएको थियो । सिंगापुरलाई सस्तैमा आउट गर्न कप्तान विपिन प्रसाद शर्मा र सचिन भट्टले उत्कृष्ट बलिङ गरे।
विपिनले १० ओभरमा १ मेडन राख्दै ३४ रन खर्चेर ४ विकेट लिए । सचिनले ६.१ ओभरमा २ मेडन राख्दै १६ रन खर्चेर ३ विकेट लिए । अभय यादव र शुभम खनालले समान १ विकेट लिए।
सिंगापुरका लागि कप्तान रियान नइकले सर्वाधिक ५३ रन बनाए। यस्तै ओपनर आहान भुथानदमले ३८ रन बनाए। नेपालले अब दोस्रो खेल मंगलबार जापानसँग खेल्ने छ।